Zelan prebenitu elikagaiek transmititutako gaixotasunak

BBK Azokan, tokiko eta kalitateko produktuen kontsumoa sustatzen dugu, baina, era berean, produktu horietaz segurtasun osoz gozatzen lagundu nahi dizugu. Elikagaiek transmititutako gaixotasunen prebentzioa kontsumitzen ditugun produktuen manipulazio eta kontserbazio egokiarekin hasten da. Jarraian, gida praktiko bat eskaintzen dizugu elikagaiak zure mahaira baldintza onenetan iritsiko direla bermatzeko.

Zer dira elikagaiek transmititutako gaixotasunak?

Gaixotasun horiek bakterioek, birusek, parasitoek edo toxinek kutsatutako elikagaiak kontsumitzeak eragindako infekzioak edo intoxikazioak dira. Patogeno ohikoenetako batzuk Salmonella, Listeria edo E. coli dira, txarto manipulatutako edo gordetako elikagaietan egon daitezkeenak.

Pertsona gehienak azkar sendatzen badira ere, kasu batzuetan konplikazio larriak eragin ditzakete, bereziki haur, adineko edo immunitate-sistema ahulduak dituztenengan.

Elikadura-gaixotasunak prebenitzeko aholkuak

1. Aukeratu produktu freskoak eta kalitatezkoak

Elikadura-gaixotasunen aurkako lehen babes-hesia da erosten dituzun elikagaiak freskoak eta jatorri fidagarrikoak direla ziur egotea. BBK Azokan, bertoko baserritar eta ekoizleekin lan egiten dugu, kalitate estandar altuak betetzen dituztenekin, produktu freskoak eta osasungarriak bermatuz.

2. Garbitu eskuak eta tresnak

Elikagaiak manipulatu aurretik, garbitu eskuak ur eta xaboiarekin, gutxienez 20 segundoz. Garrantzitsua da, halaber, labanak, ebakitzeko oholak eta elikagaiak ukituko dituen edozein gainazal garbitzea.

3. Garbitu ondo frutak eta barazkiak

Zuritu behar badituzu ere, garbitu beti frutak eta barazki edo ortuariak txorrotaren azpian, lur-arrastoak, bakterioak eta pestizidak kentzeko. Ez erabili xaboirik edo produktu kimikorik, kontsumorako egokiak ez diren hondakinak utz ditzakete eta.

4. Tenperatura egokietan kozinatu

Egosketa egokiak bakterio eta birus arriskutsuak suntsitzen ditu:

• Haragiak: egosi gutxienez 70 °C-ko barne-tenperaturan.

• Arrautzak: ziurtatu ondo egosita daudela, zuringo eta gorringo sendoekin.

• Soberakinak: 75 °C-tik gorako tenperaturan berotu kontsumitu aurretik.

5. Saihestu kontaminazio gurutzatua

Eduki elikagai gordinak eta egosiak bereizita, haragiaren, arrainaren edo arrautza gordinen bakterioek beste produktu batzuk kontamina ez ditzaten. Erabili ebaketa-taula eta tresna ezberdinak elikagai mota bakoitzerako.

6. Kontserbatu elikagaiak behar bezala

• Hoztea: produktu galkorrak hozkailuan gorde, 5 °C-tik beherako tenperaturan.

• Izoztea: egun gutxitan kontsumitu behar ez badituzu, izoztu itzazu -18 °C-tan, freskotasunari eta kalitateari eusteko.

Ez utzi kozinatutako elikagaiak giro-tenperaturan bi ordu baino gehiago.
7. Jarri arreta iraungitze-datei

BBK Azokan beti topatuko dituzu produktu freskoak, baina funtsezkoa da iraungitze-datak berrikustea eta kontserbatzeko etiketan dauden jarraibideak betetzea.

BBK Azokaren konpromisoa zure osasunarekin

BBK Azokan jasangarritasuna eta bertokoaren kontsumoa ez ezik, elikagaien segurtasuna ere babesten dugu. Gure baserritarrekin batera lan egiten dugu higiene- eta kalitate-araudi guztiak errespetatzen dituzten produktuak eskaintzeko, landatik zure mahairaino.

Bertoko produktuak aukeratzean eta manipulazio- eta kontserbazio-aholku hauei jarraitzean, zure osasuna zaintzen ariko zara, bertoko ekoizleei laguntzen eta elikagai gozo-gozo eta seguruez gozatzen.

Ezagutu produktu freskoak eta hurbilekoak BBK Azokako gure online dendan.

Zure ongizatea elikadura seguruarekin hasten da!