Zer dira 0 kilometroko (0km) produktuak eta zer onura eskaintzen dizkizute?

Ingurumen-inpaktuaz gero eta kontzienteago eta osasunaz kezkatuago dagoen mundu honetan, iraunkortasun eta kontsumo arduratsurako joerak inoiz ez bezalako garrantzia hartu du. Indartu den jardunbide edo praktiketako bat 0km-ko produktuak aukeratzea da.

Zer dira 0km-ko produktuak?

0km-ko produktuak tokian bertan ekoitzi eta kontsumitzen diren elikagaiak dira, garraio-prozesu luzerik gabe. Kontsumo-tokiaren inguruan hazitako edo landutako produktuen kontsumoa sustatzen duen praktika da, eta, horrela, distantzia luzeko elikagaien garraioari lotutako karbono-aztarna murrizten da.

0km-ko produktuen ezaugarriak

Freskoak dira, kalitate handikoak, eta, askotan, organikoak edo modu jasangarrian ekoitziak. Tokiko produktuak kontsumitzean, lotura zuzena ezartzen da ekoizlearen eta kontsumitzailearen artean, eta horrek gardentasun handiagoa bermatzen du ekoizpen- eta banaketa-prozesu osoan.

0km-ko produktuek eskaintzen dituzten onurak

Osasunerako

Produktu naturalak direnez eta biltegiratze- edo garraio-aldi luzerik behar ez dutenez, hobeto kontserbatzen dituzte mantenugaiak eta propietate organoleptikoak. Gainera, elikadura askotariko eta sasoikoagoa bultzatzen denez, dieta orekatua eta dibertsifikatua sustatzen da, funtsezkoa dena osasun ona izateko.

Ingurumenerako

0km-ko produktuak aukeratzeak duen onura handienetako bat karbono-aztarna murrizten laguntzea da. Elikagaiek beren ekoizpen-lekutik azken kontsumitzailearenganaino egin behar duten distantzia murriztean, erregai fosilen erabilera murrizten da. Gainera, garraioari lotutako berotegi-efektuko gasen emisioak txikiagoak izango dira.

Ekonomikoak eta sozialak

Ekoizleari zuzenean edo tokiko azoken bidez erosten zaionean, nekazari txikiei eta artisau-ekoizleei laguntzen zaie, eta, horrela, komunitatearen ekonomia zirkularrari laguntzen zaio. Gainera, tokiko merkataritza sustatzean, gizarte-ehuna indartzen da, eta inguruko biztanleen artean komunitate bateko kide izatearen zentzua sustatzen da.

0km-ko produktuak aukeratzeko arrazoiak

• Gure erkidegoko ekoizle eta nekazari txikiei laguntzeko modu zehatz bat da, eta horrela Bizkaiko garapen ekonomiko eta sozialari laguntzeko.

• 0km-ko produktuak freskoagoak eta kalitate hobekoak izan ohi dira, ez baitira biltegiratze- edo garraio-aldi luzeak igarotakoak. Horrek elikagai zaporetsuagoak eta elikagarriagoak ekartzen ditu.

• Kontsumitzen ditugun elikagaiak nola hazten edo lantzen diren zuzenean ezagutzeko aukera ematen digute. 

• Elikadura askotariko eta sasoikoagoa sustatzen dugu, gure dieta aberastuz eta bertako barietate tradizionalen kontserbazioa sustatuz.

0km-ko produktuak zure dietan sartzeko gomendioak

• Tokiko merkatuak, hala nola BBK Azokak antolatutakoak, bisitatzea, non baserritarrengandik zuzenean datozen elikagai freskoak eta sasoikoak aurki ditzakezun.

• Informazioa izatea zure inguruko ekoizle eta nekazariei buruz, eta haiekin harreman zuzena izatea. BBK Azokan direktorio oso bat eskaintzen dizugu, produktuen atzean nortzuk dauden jakin dezazun.

• Azokak eta BBK Azokaren online denda aprobetxatzea produktuak zuzenean erosteko.

• Informazio-iturriak bilatzea eguneratuta egon ahal izateko, haren garrantziaz sentsibilizatzeko, etab. Baita ideiak eta errezetak lortzeko ere. Horretarako eskaintzen dizugu blog hau.

• 0km-ko produktuen kontsumoa sustatzen duten tokiko ekimenak bilatu eta babestea, hala nola nekazaritza jasangarriko proiektuak.

Hurbileko produktuak aukeratzean, gure planeta zaintzeaz gain, gure osasuna eta ongizatea ere zaintzen ari gara. Eta tokiko ekonomia eta ekintzailetza bultzatzen ari gara.