entro pro

Idiazabal, tradizioa eta nortasuna - BBK Azoka

Idiazabal, tradizioa eta nortasuna

Bazkalekuak, mendia eta natura uztartzen dituen zapore biziaz, zentzumenetarako ahalmen handiko eta ñabarduretan aberatsa den dastamen-esperientzia bermatzen du Idiazabal gaztak.

Ardi latxa edo Karrantzako ardien esne gordinez egina, eta gutxienez 60 egun ontzen eman ostean, Idiazabal gaztaren usain eta ahogozoa erraz bereizten dira, baina, nortasun handikoa izan arren, gazta bakoitzak ezaugarri bereziak ditu eta bere ekoizlearen artisau-ukitua.

“Mila aldiz interesgarriagoa da zentzumenen aldetik gazta bakoitzean ñabardura ezberdinak egotea. Beti berdin-berdina ez izateak balioa ematen dio”, azaldu du Idiazabal Jatorri Deitura Babestuaren gerentea den Miriam Molinak.

Gaur egun, deitura honetan 120 gaztandegi baino gehiago daude sartuta, eta milaka urteko tradizioari eta artisau-prozesuen begiruneari esker lorturiko ezagutza jartzen dute beren produktu guztietan.

Gazta-kanpaina berria hasi baino ez da egin eta, oraindik goiz bada ere ondorioak ateratzeko, lehen dastatzeek azken urteetan izandakoen ekoizpen-maila oso antzekoak lortuko direla adierazten dute.

“Goiz samar da zehazteko ekoizpena iragan denboraldikoa baino txikiagoa edo handiagoa izango den, baina dastatzeen emaitzak azken urteetakoen ildotik doaz, bikainak alegia”, zehaztu du Molinak.

Gerenteak azaldu du klimatologia funtsezko faktorea izaten dela egiten den gazta kopuruan. Euri-sasoi oparoaren emaitza bazkaleku onak dira, eta ondorioz ardiek jaten ugari izango dute eta esne gehiago emango dute. Eta hain zuzen ere esne hori da natura-ingurunearen ñabardurak azken emaitzara eramaten dituena.

“Larrean ibiltzen diren ardiak dira eta bertoko arrazak izatea eskatzen da, lurralde honi lotuak eta bertara egokituak daudelako", gaineratu du.

Eremu geografikoei dagokienez, Euskal Autonomia Erkidegoko eta Nafarroako eskualde hezeetan aurkituko dugu Idiazabal gazta, baina adituarentzat ez dago kalitate- edo zapore-ezberdintasunik, nahiz eta kontsumo-joera batzuk egon badauden.

“Ez daude ezaugarri ezberdinak. Mugak artifizialak dira”, azaldu du Molinak, baina bere ustez egon liteke gazta ketuaren aldeko joera handiagoa Gipuzkoan Bizkaian baino, nahiz eta ez den ezaugarri nabarmenegia.

INICIAR SESIÓN

Produktua saskira sartu da

1 <