Kuiatxoak hegaluzez beteak

Osagaiak:

• 4 kuiatxo edo kalabazin
• hegaluze ontzi bat
• arrautza bat
• tipula gorri erdia 
• Ogi birrindu edo arraspatua
• 30 gr. Idiazabal gazta
• 3 koilarakada oliba-olio birjina estra
• 2 antxoa
• Gatza
• Piperbeltza

Egiteko modua:

• Garbitu kuiatxoak eta moztu xerra luze eta finetan. Bereizi 20 xerra, eta gainerakoa gorde, betegarri legez erabiltzeko.
• Berotu koilarakada bat olio zartaginean, erantsi kuiatxo txikitua, tipula xerra finetan ebakia eta antxoak. Laga su eztitan osagaiak maskaldu arte. Zartaginetik atera eta laga epeltzen.
• Irabiatu arrautza hegaluzearekin eta Idiazabal gaztarekin batera, krema leun bat lortu arte. Erantsi kuiatxoen nahastura epela eta eragin ondo.
• Nahastura horretatik ipini koilarakadatxo bat aldez aurretik gordetako kuiatxo-xerra bakoitzaren muturrean. Bildu eta joan laberako azpil batean ipintzen (koipeztatu azpila bilkariak ipini baino lehen).
• Bilkariei bota gainetik ogi birrindua, koilarakada bat oliba-olio birjina estra, gatza eta piperrautsa. Eduki labean 200°C-tan 20 minutuz.

Laiene Jatetxearen errezeta