Etxean kalabaza-marmelada egiteko errezeta, hatzak zurrupatzeko modukoa!

Kalabaza udazken-hasierako produktua izan ohi da, eta oso lotuta dago hildakoen egunaren, Gau Beltzaren, eta horren tradizioen inguruko ospakizunekin.

Kalabaza edo kuia azal gogorreko baia bat da, eta izan daitezke basa-kalabazak edo landuak. Kuiak, basokoak barne, tamaina handikoak dira, 5 cm-tik gorako diametrokoak. Askotariko formak, tamainak, testurak, zaporeak eta koloreak dituzte. Fruituak helduak zein heldugabeak izan daitezke, fruituari ematen zaion azken erabileraren arabera. 

Eta gaineratu behar dugu, gainera, erabilera zabala ematen diogula fruitu honi: gastronomian, elikagaiak eta edariak egiteko, dekorazioan, edo lanabes, artisautza-lan eta musika-tresnen fabrikazioan erabiltzen da. Kalabaza edo kuiatik dena aprobetxa daiteke, haziak, fruitua eta azala.

Oraingoan, etxean kalabaza-marmelada egiteko errezeta partekatuko dugu. Gozoa, zaporetsua, egiteko erraza da, eta etxean gaztetxoenekin egiteko jarduera bat izan daiteke. Gosari edo askari gisa erabiltzeko egokia.

Hasteko, lortu itzazu gure baserritarren kalabaza fresko batzuk. Eta beste hiru osagairekin, badaukazu errezeta.

Osagaiak

Kilo eta erdi kalabaza

800 gr azukre

Limoi bat

2 banilla-zorro

Zelan egin kalabaza-marmelada

Kalabaza prestatu

• Kuia edo kalabaza zuritu eta moztu.

• Kubo txikietan moztu.

Marmeladarako osagaiak egosi

• Jarri lapiko batean kalabaza, azukrea, limoia garbitu eta 4 zatitan moztuta, eta banilla-zorroak luzetara irekita.

• Sutan jarri, eta irakiten hasten denean, jaitsi tenperatura eta su txikian 90 minutuz eduki, eta mugitu zurezko edo silikonazko koilara batekin noizean behin. Denbora igaro ostean, likidoa dezente murriztuko da.

• Kendu limoia eta banilla-zorroak.

• Bere puntuan dagoen edo ez jakiteko, jarri marmelada-koilarakada bat plater hotz batean, eta testura zabaldu gabe mantentzen bada, prest dagoelako da. Oso likidoa dagoela ikusten baduzu, berriz, minutu batzuk gehiago utz dezakezu erdiko suan, loditasun egokia lortu arte.

• Nahi izanez gero, finagoa egin daiteke, eskuko irabiagailu batekin gutxieneko abiaduran birrinduz eta ukitu pare bat bakarrik emanez, gehien gustatzen zaizun testura izan arte. 

Zelan kontserbatu kalabaza-marmelada

Edozein marmelada kontserbatzeko, esterilizatutako flaskoetan sartu behar da oraindik bero dagoenean.

Marmeladak berehala ontziratu behar dira, oraindik bero, beirazko poto garbi-garbi eta esterilizatuetan. Ontzi-garbigailuan tenperatura maximoan garbitu daitezke, edo 10 minutuz irakin. 

Gero, ahuspez lehortzen uzten dira oihal garbien edo sukaldeko paperaren gainean, eta ez dira bete behar erabat lehortuta egon arte.

Ontziak ia goraino betetzen dira, berehala estali eta ahoz behera jartzen dira, eta erabat hozten utzi behar dira estalkia beherantz dutela. 

Gero, leku ilun, fresko eta lehorrean gorde beharko dira.