Ahuntz-gazta, plazer osasungarria

Ahuntz-esnez eginiko gaztak orain arte beste esperientzia batzuetara ohituago zegoen kontsumitzailearen aho-sabaia konkistatzen ari dira pixkanaka, kontsumitzaile hori oso leiala izaki ardi-gaztei, Euskadiko landa-giroari hain loturik daudenei.

Erosleak geroz eta aktiboagoak dira gauza berriak bilatzen eta digestioari laguntzen dioten produktuak interesatzen zaizkie, nutrizio-propietate handikoak eta bihotz-hodietako gaixotasunak izateko arriskua areagotuko ez dutenak. Hau guztia zaporeari uko egin gabe.

“Interesa gehituz doala nabari da. Zabalduz doa ahuntz-esnearen merkatua. Digestioari gehiago laguntzen dion produktua da intolerantziak dituztenentzat, eta egia da jendeak itaun asko egiten digula”, diosku Zuriñe Suarezek, Bizkaiko Askibil gaztandegikoak.

Arratia bailaran, Igorren, duen abere-ustiategian, Zuriñek bere ahuntzak jagon eta esnea batzen du, esneaz gazta freskoak, berriak eta onduak, egiteko.

Azoketan kontsumitzaileekin duen etengabeko harremanean, ohartu da erosleak harritu egiten direla Askibilgo gazten arintasun eta krematsutasunaz, eta geroz eta jakin-min eta interes handiagoa dutela produktua lantzeko prozesua eta bere ezaugarriak jakiteko.

“Harritu egiten dira zaporeaz, batzuetan uste izaten dute ahuntz-gaztak oso biziak izango direla eta harritu egiten dira leuntasunaz. Bereziki gazta freskoarenaz, oso arina baita”, dio Zuriñek.

Askibilen beraien artaldeak ematen duen esneaz bakarrik egiten dituzte gaztak, eta horrela ekoizpen-prozesuaren fase guztiak kontrolatzen dituzte. Ahuntza jaiotzen denetik, hura hazi eta elikatzeko fase guztiak bazka eta garau orekatuekin egiten dituzte, eta dena ondo gainbegiratuta esnearen kalitatea bermatzeko, horrela eginez gero gazta zaporetsu eta suabeak.

Prozesua eskakizun handikoa da, dedikazio handia eskatzen du eta artaldea etengabe jagotea. Urtean hamar hilabetez jezten dira ahuntzak eta atsedena izaten da beste bi hilabeteetan.

Gazta freskoek prozesu sinplea izaten dute, hau da, esnea batu eta pasteurizazio arina kaltzio-mailak mantentzeko. Gazta onduen kasuan, berriz, esne gordina erabiltzen da, baina gutxienez 60 egunez edukitzen da kameran.

Ahuntz-esnekiak beren tokia aurkitzen ari dira merkatuan eta kontsumitzailearen aho-sabaian, lehengaiaren propietateek bultzaturik.

Ahuntz-esneak behi-esneak baino kolesterol-maila txikiagoak ditu eta omega 6 koipe-azidoetan aberatsagoa ere bada; gainera, hesteetako floraren indargarri bezala ere funtzionatzen du, azidotasuna neutralizatzen laguntzen du eta A, B2, D bitaminak eta kaltzioa ere baditu.