Zamudio

Zamudioko Azoka

Noiz: Azaroak 05. 2016

Zamudioko Azoka, urtero Bizkaiko herri honetan egiten dena, gertakizun berezia da udalerriarentzat, bi egunez festarako janzten baita lehen sektoreari omen egiteko gozogintza eta artisautzako erakusketekin, abere-lehiaketarekin eta, noski, ohiko nekazaritza-azokarekin, kontsumitzaileari lurreko produkturik freskoen eta osasungarrienak aurkezten dizkiona.   

Joan zen azaroaren 5ean eta 6an izandako XXXI. edizioan, Zamudioko Azoka berriro bihurtu zen lehen sektorearentzako erakusleiho garrantzitsu.

Azokaren ekitaldi nagusia joan zen igandean, hilaren 6an, izan zen, herriko kaleetan nekazaritzako elikagaien azoka egin baitzen, eta bertan 90 baserritarrek hartu zuten parte.   

Ortuariak, barazkiak, frutak, gazta, eztia, txakolina… kalitatea eta aniztasuna bermatuta egon ziren eta Zamudiora hurbildu ziren milaka bisitarik Bizkaiko ortuetako produkturik berrienak dastatu eta erosi ahal izan zituzten.

Baserritarrek egiten duten lan edo beharra aitortzeko asmoz, ekitaldiaren antolatzaileek, goizeko azken orduan, sariak banatu zituzten, azokako posturik onenak nabarmentzeko.

Momoitio Baserriko Begoña Lumbrerasek lortu zuen lehen saria ortuarien kategorian. Fruta-postu onenarentzako saria Jose Etxebarriarentzat izan zen. Bitartean, J. Aranburuk eskuratu zuen lehen saria gazten kategorian, eta txakolin onenentzako sariak Erdikoetxe, Sasine eta Zabalondo ekoizleentzat izan ziren.

Gainera, baserritarren ohiturekiko jantzirik egokienarentzako saria bertako Ziortza Zarate eta Magalarte familientzat izan zen.

Azokaren barruan, Bizkaiko Limusin Abelgorrien XVI. Txapelketa egin zen, Bizkaiko Limusin Arrazako Hazleen Elkarteak (BLAE) antolatua, Bizkaiko Foru Aldundiarekin eta Zamudioko Udalarekin lankidetzan. Ekitaldi honen helburua da jatorria Frantzia hegoaldean duen behi-arraza honen egoera kolektiboa agerian jartzea.

Egun bat lehenago, larunbatean, IV. Txokolate, Gozo eta Eskulan azoka ospatu zen bertan, zaporez betetako asteburu bat betez.